Muqdisho , 21sep 2026: Ka Qaybgal Shirka Dhammaystirka Qorshaha Qaran ee Dhallinyarada, Nabadda iyo Amniga (YPS)

Agaasimaha Guud ee Wasaaradda Dhallinyarada iyo Ciyaaraha Dowladda Koonfur Galbeed Soomaaliya ayaa maanta magaalada Muqdisho kaga qaybgalay Shirka Dhammaystirka Qorshaha Qaran ee Dhallinyarada, Nabadda iyo Amniga (Youth, Peace and Security – YPS), kaas oo ay soo qabanqaabisay Wasaaradda Dhallinyarada iyo Isboortiga ee Jamhuuriyadda Federaalka Soomaaliya.

Shirka waxaa ka qaybgalay Agaasimayaasha Guud ee Wasaaradaha Dhallinyarada iyo Isboortiga ee Dowlad-goboleedyada, wakiillo ka socday hay’adaha dowladda, hay’adaha ka shaqeeya arrimaha dhallinyarada iyo ururrada dhallinyarada.

Intii uu shirku socday, waxaa si qoto dheer looga wada hadlay doorka dhallinyarada Soomaaliyeed ee nabadda, amniga iyo horumarka dalka, iyadoo ka qaybgalayaashu ay soo bandhigeen talooyin iyo aragtiyo lagu xoojinayo Qorshaha Qaran ee YPS, si uu uga jawaabo baahiyaha iyo fursadaha ay dhallinyaradu leeyihiin.

Agaasimaha Guud ayaa kulanka ka muujiyay muhiimadda ay leedahay in dhallinyarada Koonfur Galbeed iyo guud ahaan Soomaaliya ay si macno leh uga qaybqaataan dadaallada nabadeynta, xasilloonida, wada noolaanshaha bulshada iyo horumarinta dalka.

Agaasimaha Guud wuxuu bogaadiyay dadaallada lagu dhammaystirayo Qorshahan Qaran, isagoo xusay in qorshuhu yahay hannaan muhiim ah oo lagu xoojinayo ka qaybgalka, hoggaaminta iyo codka dhallinyarada Soomaaliyeed ee arrimaha nabadda iyo amniga.

Dhallinyaradu ma aha oo keliya mustaqbalka dalka; waa qayb muhiim ah oo ka mid ah nabadda iyo horumarka maanta.